ហូឡង់៖ អតីតប្រធានចារកម្មលោក Dick Schoof និងជាអតីតរដ្ឋមន្ត្រីយុត្តិធម៌ និងសន្តិសុខបានក្លាយជានាយករដ្ឋមន្ត្រីហូឡង់ថ្មីនៅថ្ងៃអង្គារ ទី២ ខែកក្កដានេះ ខណៈលោកនឹងដឹកនាំគណៈរដ្ឋមន្ត្រីចម្រុះស្តាំនិយមថ្មីក្នុងបេសកកម្មអនុវត្តគោលនយោបាយអន្តោប្រវេសន៍ "តឹងរ៉ឹងបំផុតមិនធ្លាប់មាន" នៅក្នុងប្រទេសហូឡង់។ គួរឱ្យដឹងថា រយៈពេល ២២៣ថ្ងៃក្រោយមេដឹកនាំស្តាំនិយម លោក Geert Wilders បានឈ្នះការបោះឆ្នោតដែលបង្កភាពភ្ញាក់ផ្អើលនៅទូទាំងទ្វីបអឺរ៉ុប និងពិភពលោក, លោក Dick Schoof ក៏បានចូលកាន់តំណែងជានាយករដ្ឋមន្ត្រីថ្មីរបស់ហូឡង់បន្តពីលោកនាយករដ្ឋមន្ត្រី Mark Rutte ដែលកាន់អំណាចជាង ១៤ឆ្នាំ។ 

Wilders ត្រូវបានបង្ខំឱ្យបោះបង់ចោលនូវមហិច្ឆតាផ្ទាល់ខ្លួនរបស់គាត់ក្នុងការកាន់តំណែងជានាយករដ្ឋមន្រ្តីដើម្បីរក្សាស្ថិរភាពនៃនយោបាយចម្រុះក្នុងប្រទេស ស្របពេលដែលលោកធ្លាប់បានថ្លែងការរិះគន់នូវសារនយោបាយធ្ងន់់់ៗជាច្រើន ដែលបង្កឱ្យមាននូវមតិខ្វែងគ្នាមួយចំនួនលើក្បាលម៉ាស៊ីនដឹកនាំរដ្ឋាភិបាលដោយបុរសវ័យ ៦៧ឆ្នាំរូបនេះ ជាពិសេសគឺពាក់ព័ន្ធនឹងអតីតភាពរបស់លោកជាមេដឹកនាំចារកម្មសម្ងាត់របស់ហូឡង់។ 

គួរឱ្យដឹងថា លោក Schoof គឺជានាយករដ្ឋមន្រ្តីដែលជាបេក្ខភាពឯករាជ្យ ពោលគឺលោកពុំតំណាងឱ្យគណបក្សណាមួយឡើយ ហើយនៅក្នុងការស្បថចូលកាន់តំណែង លោក Schoof ធ្លាប់បានសង្កត់ធ្ងន់ថា៖ "លោកគឺជានាយករដ្ឋមន្រ្តីសម្រាប់ប្រជាជាតិហូឡង់ទាំងមូល ហើយលោកគ្មាន (តំណាង) គណបក្សនយោបាយណាមួយឡើយ"៕